Sá gríðarlegi fjöldi erlendra ferðamanna sem nú setur svip sinn á miðborgina speglar mun örari vöxt í íslenskri ferðaþjónustu en áætlanir höfðu gert ráð fyrir. Svo virðist sem áhugi útlendinga á Íslandi aukist frá ári til árs, þvert á spár þeirra sem töldu að um tímabundna bólu tengda Eyjafjallajökulsgosi væri að ræða.
Fjölgun gistihúsa og ferðamannaverslana fer fyrir brjóstið á ýmsum sem líkja ástandinu við gullgrafaraæði sem leiða muni til ofvaxtar og óumflýjanlegs hruns svipað og varð í ferðaþjónustu Benidorm um árið.
Ekkert er þó enn fram komið sem bendir til neins nema frekari aukningar.
Fyrir rekstraraðila í miðborg Reykjavíkur felur þetta í sér ómæld sóknarfæri, en um 95% þeirra sem sækja Ísland heim kjósa að heimsækja miðborgina.
