Beikonhátíðin á Skólavörðustíg tókst með eindæmum vel. Umgjörðin var glæsileg og dagskráin vegleg, að ekki sé minnst á ljúffengar kræsingarnar. Söfnuðust háar upphæðir til styrktar Hjartadeild Landsspítalans.
Hátíðin er að sögn aðstandenda komin til að vera, en hópur Bandaríkjamanna frá Iowa kom nú í þriðja sinn til Íslands þeirra erinda að skipuleggja hátíðina í samráði við Íslendinga. Sigmundur Davíð Gunnlaugsson forsætisráðherra bauð innlendum og erlendum aðstandendum í Stjórnarráðið og sló á létta strengi – í strigaskónum.
