Jólin nálgast. Áður ráðgerðar framkvæmdir í miðborginni eru í biðstöðu vegna fornleifafunda, aðrar framkvæmdir loka fyrir umferð á helstu verslunargötum. Erlendum ferðamönnum fjölgar gríðarlega frá ári til árs og 95% þeirra sækja miðborgina heim. Hvernig ætlum við að mæta þörfum 2 milljóna ferðamanna eftir 3 ár? Á meðan bílum fjölgar, fækkar bílastæðum og almenningssamgöngur miðborgar eru í biðstöðu. Hvað bíður okkar í miðborginni á næstu mánuðum og misserum?
Þetta og ótal margt fleira verður til umræðu á opnum félagsfundi Miðborgarinnar okkar með Degi B. Eggertssyni borgarstjóra fimmtudagskvöldið 9.október kl. 20:00 á Bergsson veitingahúsinu í Sjávarklasanum, Grandagarði 16.
Auk þess að taka á móti Yoko Ono í aðdraganda Friðarsúlutendrunar, ávarpa ráðstefnugesti Meet in Reykjavík, stýra árshátíð gamla menntaskólans síns og sinna hefðbundnum borgarstjórastörfum, sækir borgarstjóri okkur heim á Grandann þetta kvöld og kunnum við honum góðar þakkir fyrir að bæta miðborgarfundi við það fjölmarga sem þegar liggur fyrir þennan dag.
Borgarstjóri kynnir það helsta sem á döfinni er auk þess sem sérstakur gestur fundarins , Áshildur Bragadóttir, nýráðinn forstöðumaður Höfuðborgarstofu, ávarpar fundinn stuttlega.
Borgarstjóri tekur síðan þátt í umræðum um miðborgarmál og svarar spurningum fundarmanna.
Fundarstjóri er Jakob Frímann Magnússon, framkvæmdastjóri Miðborgarinnar okkar.
Boðið verður upp á léttar veitingar að fundi loknum og eru allir velkomnir á meðan húsrúm leyfir.
