Nemendur Verzlunarskólans létu hráslagalegt veður ekki aftra sér í gær, en þá var hinn árlegi peysufatadagur fjórðubekkinga í Verzlunarskólanum haldinn með pompi og pragt eins og hefð er fyrir síðan árið 1924 þegar fyrsti peysufatadagur verzlunarskólans var haldinn. Víða mátti því sjá prúðbúið ungt fólk á kreiki í miðborg Reykjavíkur sem setti skemmtilegan svip á daginn. Venju samkvæmt hófst dagskráin í Bláa sal Verzlunarskólans. Þaðan var haldið á Hlemm og svo gengið niður Laugaveginn að Ingólfstorgi þar sem stiginn var dans undir harmónikkuleik.
