Frambjóðendafjör á Kjötsúpudegi Skólavörðustígs nú á laugardaginn!

N.k. laugardag 21.október verður haldinn hátíðlegur hinn árlegi Kjötúpudagur á Skólavörðustígnum kl. 13:00 – 16:00 í samstarfi dugmikilla rekstraraðila á Skólavörðustíg, ötulla framleiðenda búvöru og valinna fyrirtækja.
Screen Shot 2017-10-18 at 20.46.06
1500 lítrar af lostagóðri súpu verða eldaðir af nokkrum af fremstu matreiðslumeisturum landsins og fram reiddir víða um Skólavörðustíginn.

Mikill fjöldi fólks leggur jafnan leið sína á Stíginn af þessu tilefni enda mikið um að vera. Harmonikkuleikarar í sauðalitunum munu flytja lystaukandi meltingartónlist á meðan valdir skömmtunarmenn af báðum kynjum ausa súpum í skálar gesta, þeim að kostnaðarlausu, en meðal skömmtunarmanna eru jafnan landsþekktar matgæðingar.

Í ljósi Alþingiskosninganna verður efnt til Frambjóðendafjörs í formi laufléttra kappræðna um íslenska búvöru, en sú athylgisverða uppákoma mun eiga sér stað á traustbyggðum heyvagni og dráttarvél við Hegningarhúsið á Skólavörðustíg.

Frambjóðendum allra flokka er boðin þátttaka í kappræðunum en spyrjandi verður sjónvarpsmaðurinn góðkunni Helgi Seljan frá Suður-Múlasýslu,
en kynnir og tímavörður verður Jakob Frímann Magnússon organisti og fv. fjósamaður frá Hvítárbakka í Borgarfirði.

Kappræðurnar fara fram kl. 14:30 – 15:15 við Hegningarhúsið og vísast mun að mæta tímanlega því veðurspáin er á þann veg að búast má við miklu fjölmenni þennan dag.

Miðborgin Reykjavík er samstarfsvettvangur rekstraraðila í miðborginni.
© 2023 Miðborgin Reykjavík - Allur réttur áskilinn - Bankastræti 5, 101 Reykjavík
Miðborgin Reykjavík er samstarfsvettvangur rekstraraðila í miðborginni.