20 ára afmæli Menningarnætur í Reykjavík er framundan og verður einstaklega mikið um dýrðir um gjörvalla miðborgina á þeim Drottins degi, laugardeginum 22.ágúst, en hápunktur Menningarnætur er öllu jöfnu flugeldasýningin sem efnt er til við hafnarbakka miðborgarinnar kl. 23:00.
Landsbankinn leggur á ári hverju fram fjármuni sem hægt er að sækja um hlutdeild í og var í sl. viku kynnt hverjir hlotið hefðu styrki. Meðal þeirra verkefna sem hlutu styrk var þriggja daga Texas Blues & BBQ hátíð á Grandagarði sem skartar mörgum af fremstu blúsmeisturim þjóðarinnar.
Það er Magnús Ingi Magnússon veitingamaður á Sjávarbarnum og Texasborgurum sem á mestan veg og vanda af undirbúningi.
Hátíðin mun hefjast að kveldi fimmtudagsins 20.ágúst, halda áfram á föstudagskvöldi og ljúka með stæl á laugardagskvöldinu 22.ágúst, á sjálfri Menningarnótt. 
Nánari upplýsingar um flytjendur getur að líta hér á síðunni.
